Kuimarisha Usalama Wa Kidijitali Kwa Watoto

ChildFund International na Tume ya Umoja wa Afrika (AUC) wametia saini mkataba wa kuhamasisha sekta ya kibinafsi na ya umma kusaidia kuunda mazingira salama ya mtandaoni kwa watoto.

Hii inafuatia kuongezeka kwa visa vya unyonyaji na unyanyasaji wa watoto mtandaoni kupitia teknolojia ya kidijitali.

ChildFund inaongoza msukumo wa sera na sheria za kukomesha unyanyasaji wa kingono na unyanyasaji wa watoto mtandaoni kupitia Maelewano yaliyotiwa saini hivi majuzi na AUC katika Makao Makuu ya AU mjini Addis Ababa, Ethiopia. Chini ya makubaliano hayo, mashirika hayo mawili yatafanya kazi pamoja kutetea nchi wanachama wa AU katika kuanzisha mifumo ya kisheria na vyombo vya sheria vya kulinda na kuendeleza haki za watoto mtandaoni.

Amb. Minata Samaté Cessouma ambaye ni Kamishna wa AU wa Afya, Masuala ya Kibinadamu na Maendeleo ya Jamii  alisema kuwa, AUC inataka kukabiliana na ongezeko la ushawishi mbaya wa unyonyaji na unyanyasaji wa watoto mtandaoni kote barani Afrika. Mkurugenzi wa ChildFund Kanda ya Afrika Chege Ngugi, alisema kwamba pamoja na kuongezeka kwa manufaa kadhaa kwa watoto katika upatikanaji wa mtandao  kama vile kupata fursa za elimu na taarifa za afya, bado kumewaweka watoto kwenye hatari zaidi mtandaoni.

“Wazazi, walimu, serikali, watunga sera, kampuni za teknolojia, wadhibiti, mashirika ya kutekeleza sheria na watoto lazima washirikiane ikiwa tunataka kufanya maendeleo makubwa,” alisema Bw Ngugi.

ChildFund na AU pia zitahamasisha washirika wa kimataifa na kikanda wa umma na binafsi katika kuunga mkono mwito wa kukomesha unyonyaji na unyanyasaji wa watoto mtandaoni, ikiwa ni pamoja na Muungano wa Kimataifa wa Mawasiliano (ITU). Zaidi ya hayo, watahamasisha vyombo na kamati mbalimbali za Umoja wa Afrika – kama vile Kamati ya Wataalamu wa Afrika kuhusu Haki za Mtoto na Ustawi wa Mtoto (ACERWC) ili kukuza na kulinda haki za watoto mtandaoni.