Siku ya Mtoto wa Kiafrika; Kulinda Mustakabali wa Watoto wa Afrika

Tunapojiandaa kuadhimisha Siku ya Mtoto wa Afrika, tunakumbushwa na changamoto kubwa zinazowakabili watoto kote barani, hasa katika maeneo kama Congo na Sudan. Changamoto hizi zinaonyesha taswira ya wazi ya dhiki na uthabiti, ambapo watoto wanapitia masaibu ambayo hayafai kwa mtoto yeyote.

Kama “mvua ya vuli,” utoto katika Congo na Sudan umefunikwa na ukweli mgumu wa ajira ya watoto, vifo vya watoto, ndoa za mapema, ukosaji wa masomo na ujauzito wa watoto. Watoto wanakosa fursa ya kufurahia ucheshi wao, badala yake wanajikuta wakilazimika kufanya kazi ngumu kama migodi au kupata mimba za mapema ambazo zinanyang’anya mustakabali wao. Ushuhuda wa hivi karibuni kutoka Sudan unatuambia kuhusu ukatili wa vita, ambapo watoto wasio na hatia walichinjwa walipokuwa wakijaribu kutoroka ghasia.

Zaidi ya hayo, migogoro inaendelea kuchochea matatizo kama utapiamlo na ukosefu wa huduma za msingi kama maji safi na usafi. Kuhamishwa kwa familia kunavuruga elimu ya watoto, kuwaacha katika kambi za wakimbizi, wakiwa hatarini mwa unyanyasaji.

Elimu, kama ilivyoenyezwa na kaulimbiu ya mwaka huu, “Elimu kwa watoto wote barani Afrika: wakati ni huu,” ni ufunguo wa kuvunja mzunguko wa umaskini na kujenga mustakabali bora. Hata hivyo, ukweli ni kwamba nchi nyingi za Afrika hazitengi rasilimali za kutosha kwa elimu, na ni nchi chini ya asilimia tano tu, zinazokidhi asilimia 20 iliyopendekezwa ya bajeti ya kitaifa. Hii inasababisha madarasa yenye msongamano, walimu wasio na mafunzo ya kutosha, na upungufu wa vifaa vya kujifunzia, kukwamisha watoto kujifunza stadi wanazohitaji ili kufanikiwa.

Tunapoadhimisha siku ya mtoto wa Kiafrika, ni muhimu kwa serikali, mashirika ya kimataifa, na jamii kwa ujumla, kuweka kipaumbele katika kulinda na kuhakikisha ustawi wa watoto wa Afrika. Hatua za dhati zinapaswa kuchukuliwa kutekeleza sheria dhidi ya ajira ya watoto, kumaliza ndoa za utotoni, na kutoa msaada kamili kwa mama wanaoanza familia wakiwa bado vijana. Uwekezaji katika elimu lazima uongezwe ili kuhakikisha kwamba, kila mtoto anapata elimu bora inayowajengea msingi ulio imara wa maisha ya baadaye.

Lakini zaidi ya sera na ufadhili, tunahitaji mabadiliko ya kijamii na dhamira ya pamoja , hasa ahadi kutoka kwa kila mmoja wetu katika kushughulikia mila na desturi zenye madhara na kuheshimu haki za watoto.

Tukisherehekea Siku ya Mtoto wa Afrika, naomba tujizatiti tena kulinda utoto na mustakabali wa watoto wa Afrika. Tufanye kazi pamoja kujenga bara ambapo haki za kila mtoto zinaheshimiwa, sauti zao zinasikilizwa, na ndoto zao zinatimizwa.

Wakati wa kuchukua hatua ni sasa, kwa ajili ya sasa hivi na kwa ajili ya mustakabali wenye matumaini ya Afrika.