Mlipuko wa ugonjwa wa kipindupindu katika Kaunti Ndogo ya Nyando, Kaunti ya Kisumu, umesababisha vifo vya watu watatu, akiwemo mtoto wa mwaka mmoja, Jambo ambalo limechochea uchunguzi wa mamlaka za afya.
Chifu Msaidizi wa Kobongo, Samuel Orage, alithibitisha kuwa vifo hivyo vilitokea ndani ya wiki moja, hali iliyozua hofu kuhusu kuenea kwa ugonjwa huo wa kuendesha.
“Kifo cha kwanza kiliripotiwa wiki iliyopita, huku vingine viwili vikirekodiwa wiki hii,” alisema Orage, huku akiongezea kuwa baadhi ya wanafamilia wa waathiriwa walionyesha dalili zinazohusiana na kipindupindu.
Waathiriwa wanatarajiwa kuzikwa kesho kwa kuzingatia mwongozo mkali wa afya ya umma ili kuzuia maambukizi zaidi. “Tutahakikisha hakuna sherehe au mikusanyiko wakati wa mazishi,” alisisitiza Orage.
Mtendaji wa Afya wa Kaunti ya Kisumu, Dkt. Gregory Ganda, alithibitisha kuzuka kwa ugonjwa wa kuendesha katika eneo hilo, lakini akasema maafisa wa afya bado wanasubiri matokeo ya vipimo vya maabara ili kuthibitisha ikiwa ni kipindupindu.
“Tuko katika hali ya tahadhari, lakini uthibitisho rasmi utategemea matokeo ya maabara,” alisema Dkt. Ganda.
Mamlaka zimewataka wakazi wa eneo hilo kuzingatia hatua kali za usafi huku uchunguzi ukiendelea.