Written by Alice Njoki
Mtoto wa miaka mitatu aliyeripotiwa kupotea tarehe 13 Februari 2026 kutoka nyumbani kwao Malindi Central, Kaunti ya Kilifi, amepatikana salama karibu na mpaka wa Kenya na Tanzania baada ya wazazi wake kutoa taarifa kwa maafisa wa upelelezi.
Kwa mujibu wa taarifa kutoka kwa maafisa wa Idara ya Upelelezi wa Makosa ya Jinai, polisi walifuatilia nyendo za mwisho za mtoto huyo na kubaini kuwa alikuwa ameondoka akiwa pamoja na mshukiwa aliyekuwa akifanya kazi ya upambaji wa kucha. Mshukiwa huyo alionekana kwenye kamera za ulinzi akimchukua mtoto na kuondoka naye kuelekea mahali pasipojulikana.
Mwanaume huyo, aliyetambulika kwa jina la Arnold Ethan, mwenye umri wa miaka ishirini na tisa (29) na raia wa Uganda, alikamatwa katika eneo la Horohoro alipokuwa akijaribu kuvuka mpaka kutoka Kenya kwenda Tanzania akiwa na mtoto huyo.
Mtoto alirejeshwa kwa wazazi wake akiwa salama na kupelekwa hospitalini kwa uchunguzi wa kiafya. Wakati huo huo, maafisa wa usalama wameanza taratibu za kisheria dhidi ya mshukiwa.
Kwa sasa, mshukiwa anazuiliwa kwa tuhuma za utekaji nyara wa mtoto na kosa la kujaribu kumvusha mtoto nje ya nchi kinyume cha sheria. Kesi hiyo imewasilishwa mahakamani na uchunguzi unaendelea ili kubaini iwapo kulikuwa na washirika wengine au mipango zaidi iliyohusishwa katika tukio hilo.