Ukiukaji wa Haki za Watoto Baada ya Wanafunzi 50 na Zaidi Kuathiriwa na Mabomu ya Machozi

Tume ya Kitaifa ya Jinsia na Usawa (NGEC) imelaani tukio la kuwarushia vitoa machozi wanafunzi wa Shule ya Msingi ya Kihumbuini huko Kangemi.

Siku ya Jumatano, zaidi ya wanafunzi 50 walikimbizwa hospitalini baada ya polisi kuvamia vitoa machozi darasani mwao wakati wa maandamano ya kuipinga serikali. Katika taarifa iliyotolewa Alhamisi, mwenyekiti wa NGEC Joyce Mutinda alisema kwamba, anashutumu vikali visa vya urushaji machozi kwa watoto wa shule wasio na hatia.

“Ni ukiukaji wa wazi wa Kifungu cha 53 cha Katiba ya Kenya, 2010 ambacho kinawapa watoto ulinzi na kuwahakikishia usalama wao katika hali zote,” Mutinda alisema. “Zaidi ya hayo, Kenya inafungwa na sheria za kimataifa kutetea haki za watoto wakati wa vita vya wenyewe kwa wenyewe, na hivyo kusisitiza uzito wa tukio hili.”

Mutinda alitaka uchunguzi wa kina na huru ufanyike kuhusu mazingira yaliyosababisha matumizi ya vitoa machozi ndani ya shule. “Mamlaka Huru ya Kusimamia Polisi (IPOA) lazima ianze uchunguzi huu na kuhakikisha kwamba wale waliohusika na vitendo hivyo vya kuchukiza wanawajibishwa kwa utovu wa nidhamu wao,” alisema.

Alisema kwamba, usalama na ustawi wa watoto haufai kamwe kuathiriwa kwa hali yoyote ile. Aliongeza kuwa, haki lazima itendeke kwa wanafunzi walioathirika, pamoja na walimu na familia.

Aidha Mutinda aliitaka serikali na wadau wote husika kuweka kipaumbele katika ulinzi wa haki za binadamu hasa wakati wa maandamano. “Tunasimama kidete katika dhamira yetu ya kutetea usawa, haki, na ustawi wa watu wote, hasa wanajamii walio hatarini zaidi,” Mutinda alisema.

“NGEC inalaani kitendo chochote cha vurugu, uharibifu, uporaji, au ubaguzi unaofanywa wakati wa maandamano.”