Mombasa: Baba achoma nyumba baada ya kuwanyonga wanawe wawili

Familia moja mjini Mombasa inaomboleza kifo cha watoto wawili wanaodaiwa kunyongwa hadi kufa na baba yao na kuchomwa ndani ya nyumba yao eneo la Bombolulu Workshop.

Jason Chacha, mzee wa miaka 55 na baba wa watoto watatu wanasemekana kuwaua watoto hao wawili wenye umri wa miaka 4 na 8 mtawalia Jumatatu saa 2 asubuhi alafu kutoroka.

Kulingana na mkewe Maria Boke, kisa hicho kilitokea baada ya mumewe wa ndoa ya zaidi ya miaka 10 kumtishia kuondoka nyumbani la sivyo angemuua Jumapili usiku.

“Nimepitia changamoto nyingi sana kwenye ndoa yangu kwa muda mrefu lakini sijawahi kufunguka kwa mtu yeyote. Nimekumbana na ukatili wa kupita mipaka kutoka kwa mume wangu ikiwemo kunipiga lakini mambo yalizidi kuwa mabaya wiki hii,” alisema.

Boke alisema kwamba, siku ya Ijumaa mume wake alimpiga vibaya mno, na Jumapili saa mbili usiku alilazimika kukimbilia kutafuta hifadhi kwa rafiki yake baada ya kutishiwa kuuwawa na mumewe, usiku ambao watoto wake waliuawa.

“Aliponiambia niondoke nyumbani sikujua nia yake. Nilienda kulala nyumbani kwa rafiki yangu ndipo nilipopigiwa simu saa 7 alfajiri na kujulishwa kuwa watoto wangu wamefariki na wako chumba cha kuhifadhia maiti, jambo ambalo sikuamini hadi nilipoenda kuthibitisha,” alisema.

Boke alisema kuwa, siku ya Jumatatu mumewe alimpigia simu na kumwambia kuwa hakuwachoma tu watoto hao, badala yake, aliwanyonga na kuwachoma ndani ya nyumba kwa kutumia mafuta ya taa.

Mama huyo wa watoto watatu sasa anaiomba serikali kusaidia katika kumsaka na kumkamata mumewe ili kuhakikisha haki kwa watoto wake inatendeka.

Garama Kahindi ambaye ni jirani yake alisema kuwa, kupitia msaada wa majirani wengine walifanikiwa kuzima moto huo saa tisa asubuhi kwa kutumia maji.

Binti wa kwanza wa familia hiyo mwenye umri wa miaka 14 alisema kuwa aliokolewa na majirani baada ya kupiga kelele za kuomba msaada alipozinduka na kuona moto huo kwa sababu alikuwa amelala sebuleni.

Mathias Shipeta, mwanaharakati wa haki za binadamu wa HAKI Afrika ambaye alithibitisha kutokea kwa tukio hilo alisema kwa mujibu wa taarifa waliyoipata wanaamini kuwa kulikuwa na mchezo mchafu katika kifo cha watoto hao wawili.

“Hili ni tukio la kusikitisha la baba kuwaua watoto wake. Kwa hivyo tunatoa wito kwa maafisa wa polisi kuchunguza madai yaliyoibuliwa na mama wa watoto walioaga dunia na DCI pia kushughulikia suala hilo ili kumkamata mwanamume huyo na kuleta haki kwa familia,” akasema.

Shipeta, ambaye aliitaka serikali kusaidia familia hiyo kusuluhisha suala hilo kwa sababu haijaimarika kifedha, alisema kuwa kisa hicho kiliripotiwa katika kituo cha polisi cha Nyali.

Kamanda wa polisi wa kaunti ndogo ya Nyali Daniel Mumasaba alisema kuwa miili ambayo ilikuwa na moto ilipelekwa katika chumba cha kuhifadhi maiti cha walimu na rufaa ya Pwani.

“Mwanamume huyo bado hajapatikana lakini uchunguzi wa maiti utafanywa ili kubaini ikiwa watoto hao walinyongwa kwanza kabla ya kuchomwa na mwanamume huyo,” alisema.