Uganda: Shule kufungwa mapema baada ya watoto wanane kufariki kwa Ebola

Shule zote nchini Uganda zitafungwa wiki mbili kabla ya muhula uliopangwa kukamilika baada ya visa 23 vya Ebola kuthibitishwa miongoni mwa wanafunzi, wakiwemo watoto wanane waliofariki.

Waziri wa Elimu Janet Kataha Museveni alisema Jumanne kwamba baraza la mawaziri lilichukua uamuzi wa kufunga shule za awali, shule za msingi na shule za upili mnamo Novemba 25 kwa sababu madarasa yaliyojaa yalikuwa yanawafanya wanafunzi kuwa katika hatari kubwa ya kuambukizwa.

“Kufungwa kwa shule mapema kutapunguza maeneo ya mkusanyiko ambapo watoto wanawasiliana kila siku na watoto wenzao, walimu na wafanyikazi wengine ambao wanaweza kueneza virusi,” waziri, ambaye pia ni mke wa Rais wa muda mrefu Yoweri Museveni, alisema katika taarifa. .

Wanafunzi nchini Uganda kwa sasa wako katika muhula wao wa tatu na wa mwisho wa mwaka wa kalenda. Siku ya Jumamosi, serikali iliongeza muda wa wiki tatu wa kutotoka nje kwa wilaya jirani za Mubende na Kassanda, ambazo zimekuwa kitovu cha mlipuko wa Ebola.

Hatua hizo ni pamoja na amri ya kutotoka nje kuanzia jioni hadi alfajiri, marufuku ya kusafiri kibinafsi, na kufungwa kwa masoko, baa na makanisa. Tangu kuzuka kwa ugonjwa huo kutangazwa huko Mubende Septemba 20, ugonjwa huo umeenea kote nchini, ikiwa ni pamoja na mji mkuu, Kampala, lakini rais amesema kwamba, vikwazo vya nchi nzima havihitajiki.

Kwa mujibu wa takwimu za serikali kuanzia Jumapili, watu 135 wameambukizwa Ebola na 53 wamefariki dunia.

Shirika la Afya Duniani (WHO) wiki iliyopita lilisema kwamba, Uganda imesajili zaidi ya kesi 150 zilizothibitishwa na zinazowezekana, ikiwa ni pamoja na vifo 64. Kifo cha mwisho kilichorekodiwa nchini Uganda kutokana na mlipuko wa awali wa Ebola kilikuwa mwaka 2019.

Virusi vinavyozunguka Uganda ni aina ya Ebola ya Sudan, ambayo hakuna chanjo iliyothibitishwa, tofauti na aina ya kawaida ya Zaire, ambayo ilienea wakati wa milipuko ya hivi karibuni katika nchi jirani ya Jamhuri ya Kidemokrasia ya Kongo.

Ebola huenezwa kupitia maji maji ya mwili na dalili za kawaida ni homa, kutapika, kutokwa na damu na kuhara. Milipuko ni ngumu kudhibiti, haswa katika mazingira ya mijini. Ebola kwa ujumla huua karibu nusu ya watu inaowaambukiza.

Mkuu wa WHO Tedros Adhanom Ghebreyesus alisema katikati ya mwezi wa Oktoba kwamba majaribio ya kliniki ya chanjo ya kukabiliana na aina ya Ebola ya Sudan yanaweza kuanza ndani ya wiki chache.